Orkuskipti í samgöngum - För hugans í góðum anda frá einum kosti að öðrum betri en framhjá þeim besta - hvernig má svo vera að því gefnu að samfélagslegur, efnahagslegur og umhverfislegur ábati ráði för.

Fræðimenn hafa bent á að einstaklingar leitast við að sinna viðfangsefnum sínum, greiningu og ákvarðanatöku í stafi og leik með mismunandi hætti . Og að val manna um verklag og leiðarval megi rekja, meðal annars,  til virkni í heilastarfsemi  hvers og eins.  Þannig má mér vera ljóst að texti minn verður lesinn með mismunandi hætti og að viðbrögð lesandans mótist að hluta af ríkjandi lífeðlisfræðilegri virkni í hægri og vinstri heilahveli hans.

Tæknin hefur um alllangt skeið gert manninum kleift að stunda rannsóknir á heilastarfsemi heilbrigðra einstaklinga. Með tilkomu  EEG tækninnar árið 1929 varð unnt að rannsaka leyndardóm heilastarfseminnar með nýjum hætti þar sem virkni tauga í heilanum varð mælanleg .  Frá árinu 1928 hefur margvísleg tækni og víðtækar rannsóknir varpað ljósi á gangverk okkar, fas,  framkomu og hneigð svo fátt eitt sé nefnt :  CT (1970+), PET (1970+), MRI (1980+), fMRI (1990+), MRS (1990+) og MEG ( 2000+). Allt um þetta hér.

Í einfaldri mynd má segja að skipta megi heila okkar upp í svæði og að mismunandi úrvinnsla eigi sér stað á mismunandi svæðum í heilanum.  Greinamunur hefur verið gerðu á virkni í hægri og vinstri hluta heilans eftir eðli verkefnis (áreitis, viðfangsefnis) sem heilinn fæst við. Á þessu svið hefur  Roger Sperry , Nóbelsverðlaunahafi  árið 1981 og taugalífeðlisfræðingur verið skilgreindur sem einn brautryðjenda.

Vinstri  hluti heilans:  Virkni er mun meiri í VINSTRI  hluta heilans ef viðfangsefni einstaklingsins lítur að rökfræði, útlistun og stærðfræði svo fátt eitt sé nefnt.  Hann er mjög virku þegar fengist er við þrautir,  útreikninga  og áætlanagerð. Vinstri hlutinn leitar eftir skipulagi og mun búa það til ef það er ekki til staðar. Hann er mjög virkur við útskýringar og leitast við að setja viðfangsefni í samhengi.  Ef þú spyrð ,,vinstri hluta heilans‘‘ hvers vegna hann gerði eitthvað,  mun hann leita allra leiða til að búa til sögu sem virðist rökrétt - jafnvel þótt sagan sé ekki  rétt  ( Þýtt - EMERGENETICS , Geil Browing, Phd ).

Hægri  hluti heilans:  Virkni er mun meiri í HÆGRI hluta heilans ef viðfangsefni einstaklingsins lítur að innsægi, tilfinningum, hugmyndasmíði og heildarsýn svo fátt eitt sé nefnt. Hægri  hluti heilans er mjög virku þegar fengist er við fas, framkomu, sjónræn viðfangsefni og samfélag málefni í víðu samhengi.

Niðurstöður  rannsókna styðja þá tilgátu að fólk leitist við að haga störfum sínum, fasi og framkomu með hætti sem eykur virkni, annað hvort ,  í vinstri hluta heilans eða hægri hluta hans- að fólk hafi tilhneigingu til að hugsa á nótum sem eykur annað hvort virkni vinstri eða hægri hluta heilans.

Ofangreindur textir er þýddur og endursagður úr bókinni EMERGENETICS , Geil Browing,  Phd .

 Hvaða tilgangi þjónar þessi inngangur hjá mér fyrir texta sem átti að veita útrás fyrir óánægju með umræðu sumra  um orkuskipti í samgöngum ?  Jú,  ég er eflaust í góðum anda að ríghalda í þá tilgátu að fólki gangi gott eitt til, þótt umræðan um  rafmagnsvæðingu í íslenskum samgöngum hafi verið jafn óraunsæ og hún hefur verið á stundum. Og sérstaklega þegar horft hefur verið til næstu 20 ára.

 Ég er sennilega að leifa mér að trúa því, um stund, að vinstra heilahvelið hafi fengið full frjálst spil í málflutningi sumra talsmanna rafmagnsvæðingarinnar án þess að þeir geri sér grein fyrir því. Að vinstra heilahvel þeirra hafi einfaldlega fengið að leita allra leiða til að búa til sögu sem virðist rökrétt - jafnvel þótt saga þeirra og tímasett áætlun sé það í raun ekki.  

Athugasemdir

[Kjartan Hávarður (IP-tala skráð) 23.9.2009 kl. 13:58]

Sæll Einar,hefur þú litið á þetta?

http://www.magnegas.com/index.html

http://www.youtube.com/watch?v=Wy0WXkj1Drw

Bestu kveðjur

Kjartan

[Einar Vilhjálmsson, 23.9.2009 kl. 23:29]

Takk fyrir þetta Kjartan. Þú tókst eftir því að þessi magnaða meðhöndlun á vatni (H2O) í skilar eldsneytinu Magnegas sem bílar geta gengið fyrir sem hafa metanbúnað. Hér sem sé um að ræða annan valkost til að nýta metanbúanað bíla í framtíðinni. Við eigum vatnið og rafmagnið og þurfum ekki mun dýrari og flóknari bíla en við þekkjum og notum í dag.  Þessi tækni og þessi valkostur fyrir heimsbyggðina á það sammerkt með metani (bio-methane) að sjálfbærnin verður eins mikil og hún getur orðið  framleiðir ekki sína eigin bíla.

Og þá fara þeir að skilja, sem eru að átta sig á ávinningi þess fyrir Ísland að nýta metan sem eldsneyti, hvers vegna þeir hafa ekki vitað þetta fyrir margt löngu. Sjálfbærnin er versti óvinur stóru viðskiptaáætlananna í heimþorpinu í samgöngum.  Þess vegna ferðast talsmenn batteríframleiðenda (sendisveinar þeirra) um allan heim og boða komu rafmagnsökutækja á morgun þótt vitað sé að áratugir eru í að slíkir bílar getir reynst eitthvað nálagt því eins hagfelldir og  bíll sem gengið getur fyrir metani og ef til vill magnegasi, hver veit - sömu vélar. Meira að segja urðum við vitni af því í Kastljósi um daginn að opinskár boðberi um rafmagnsbílinn sagði blátt áfram að aðal tilgangurinn núna væri að tryggja að fólk fjárfesti í rafmagnsbíl næst.

Annað. Ég hef ekkert á móti tækniþróun og fagna innilega hagfelldustu valkostum fyrir almenning, samfélagið og umhverfið. Ég hef hins vegar nokkuð óþol fyrir lýðskrumi og afvegaleiðslu sem drifin er áfram a vængjum meintrar sjálfbærni frá aðilum í heimsþorpinu sem kappkosta að ráða streymi fjármagns í landflutningum þeirra landa sem gleypa við rafhlöðuvæðingunni sem þjóðhagslega hagfelldri lausn. Hvað sjálfbærni eða samgönguöryggi er í því að eiga rafmagn til að hlaða rafhlöðu í bíl ef 55-75% af verði bílsins er falið í verði rafhlöðunnar sem aðeins einn aðili getur skaffað í tiltekna tegund af bíl? Og þó þeir væru fimm.  Sá tími kann að koma að rafhlaðan og viðskiptamódel hennar verði hagfelldasti samgöngumátinn á Íslandi þótt vandséð er að svo verið. Í því samhengi eru vongóðir menn að horfa til miðrar þessarar aldar en þó ekki fyrir stærri ökutækja og skipaflotann eins og unnt er að gera með metan eldsneyti þegar í dag. Metan eldsneyti nýtist í samgöngum á landi, sjó og lofti nú þegar og enn frekar í framtíðinni og því ekkert betra fyrir okkur Íslendinga  en að nýta öll tækifæri okkar til framleiðslu og notkunar á íslensku metan - við getum framleitt það magn sem og við kjósum að gera.