Metanvæðing strætó í Evrópu - Svíar kosta miklu til að geta breytt þúsundum fólksflutningabíla úr dísilolíu í metan - ávinningurinn er það mikill.

Hvernig stendur á því að Svíar láta ekki úreldingu núverandi bíla ráða hraðanum á innleiðingu metans sem eldsneytis fyrir  fólksflutningabílana?  Hafa þeir reiknað dæmið svona vandlega ?  Já, ætli það ekki. Og til lítils að rökstyðja aðgerðarleysi með huglægum gagnrökum , nema þá ef aðgerðarleysi er markmiðið og huglæg gagnrök nægja til að því sé náð - smekkur, tíska og tilfinning. Ávinningur Svía er mikill og margþættur -  rekstrarlegur, þjóðhagslegur og umhverfislegur.  Sjá frétt að neðan.

Í Reykjavík eru tveir strætisvagnar sem ganga fyrir metani og reynslan á mörgum sviðum verið mjög góð. Og það sem bæta má er vitað og aðgerðarhæft. Rétt er að minna fólk á að rugla ekki saman METAN-vögnum og  þeim tveimur vetnis-vögnum sem keyptir voru í tilraunaskini og eru ekki lengur í notkun. Eitt er ljóst, Svíar eru ekki að kosta miklu til við rannsóknir, til að geta breytt bílaflota sínum yfir í metan, ef úreldingarleiðin væri  hagfelldust. Hið minnsta er ljóst,  í Svíþjóð verður ekki nýr dísil-vagn eða rúta keypt til að sinna skilgreindum áætlunarakstri nema afar sérstakar ástæður liggi þar að baki.  

Ávinningur okkar Íslendinga af því að taka einn metan-strætisvagn í notkun er ansi mikill. Rétt að skoða það vandlega með hlutlægum hætti síðar. Það lætur nærri að einn vagn noti 47.000 til 50.000 lítra af dísilolíu á ári. Í fljótu bragði fæ ég ekki betur séð en að núvirði gjaldeyrissparnaðar megi rökstyðja að nemi  um 15 milljónum vegna minni innflutnings á dísilolíunni ( og ef ávöxtunarkrafan til núvirðingar er 10%) . Þá mætti einnig rökstyðja að núvirði fjármagnsaukningar í umferð nemi um 60 milljónum, ef við miðum við veltuhraða fjármagns x4.  Aukin velta upp á 60 milljónir gæti hæglega skilað ríkissjóði um 12 milljónum í tekjur ( virðisaukaskattur , ef miðað er við meðaltalið 20.3%)  Þar fyrir utan skapast nettó ávinningur af lækkun á losun CO2 í borginni sem nemur 133 tonnum af CO2 á ári , eða tíföld sú tala miðað við 10 ára notkunartíma á hverjum vagni.  Margt annað mætti nefna og verður gert síðar.

Já, þetta eru tölur fyrir aðeins einn vagn... já....   

 Sjá frétt:  http://www.metan.is/user/news/view/0/231

 

Athugasemdir

[Sigurður Grétar Guðmundsson, 22.5.2009 kl. 09:34]

Ég hef áður sent þér nokkur orð um þráhyggju þína um að vilja metanvæða bilaflota landsmanna og bendir á fordæmi Svía. Ég held að metanvæðing skipaflotans sé rétt að kanna og það strax en bílaflotann (og önnur tæki á landi svo sem vinnuvélar) á tvímælalaust að rafvæða, rafvélar með rafhlöðum í ökutæki eru í örri þróun. Þar að auki þarf akki að eggja í hálsbrjótandi kostnað viða setja upp dreifistöðvar fyrir metan, hvert heimili er nú þegar dreifistöð fyrir rafmagn. Ég tel sjálfsagt að útrýma olíu sem brennsluefni sem fyrst en ekki vegna CO2, það gas kemur okkur ágætlega til að efla gróður, ekki er vanþörf á. Olía er allt of dýrmæt auðlind til  að brenna henni, hún á að notast til hverskonar efnaiðnaðar. Hysterían í loftslagsmálum og öll blekkingin sem þar viðgengst er yfirþyrmandi. Vona að þú hlustir á Dr. Fred Goldberg sem verður með fyrirlestur föstug. 29. maí kl. 11:00 Is it CO2 or the sun and ocean currents that controls our climate?

[Einar Vilhjálmsson, 22.5.2009 kl. 12:59]

Takk fyrir þetta Sigurður.  Við erum klárlega sammála um að breyting á eldsneytisnotkun þjóðarinnar er þjóðþrifaverkefni. Og að sjálfbærni okkar um öflun orku til að knýja ökutæki og vélar veiti þjóðinni mikinn og margþættan ávinning. Við erum örugglega einnig sammála um að ákvarðanir um hvað við gerum meira af þurfi að grundvallast á heildrænu, raunhæfu og aðgerðarhæfu mati. Rafvélar með rafhlöðum eru í þróun og munu verða það lengi enda eftir miklu að slægjast hjá þeim sem eignast markaðinn fyrir rafhlöðurnar og langur vegur að lausnir blasi við fyrir allar gerðir ökutækja. Fagna ber hverri þróun sem skapar mestan heildrænan ávinning og þegar ljóst að heildrænn ávinningur þjóða er mismunandi í þessum efnum. Þannig er staða Dana allt önnur en Svía til að mynda hvað varðar tækifæri til að nýta lífrænan úrgang og lífmanna til eigin framleiðslu á metani.  Metanvæðingin er á fleygi ferð um allan heim Sigurður og framboð bílaframleiðenda staðfestir það.  Þú nefnir dreifikerfið sem hálsbrjótandi kostnað ef við förum á metan í auknum mæli. Hér þurfum við að staldra við.

 

Hvað er hægt að gera með umtalsverðum ávinningi án þess að kosta miklu til. Frá stöðu okkar í dag höfum við tækifæri til að stíga stór heillaspor með hagfelldum hætti.  Ef við skoðum, sem dæmi, fólksflutningabíla í föstum áætlunarferðum og vöruflutninga um þjóðveginn. Ekki þyrfti  margar áfyllistöðvar til að geta sinnt þeirri starfsemi á íslensku metani meira og minna. Ávinningurinn hér er eflaust meiri en þú gerir þér grein fyrir - rekstrarlegur, þjóðhafslegur og umhverfislegur. Við þurfum ekki að bíða til að geta notið þessa ávinnings. Við blasir aðgerðarhæft tækifæri strax í dag.  Kostnaðurinn við að bíða eftir fullnustu þeirrar fögru sýnar sem blasir við þér er einfaldlega alltof hár. Hér eiga orð þín við um hálsinn og kostnaðinn- hinn heildræni kostnaður.  Með nokkrum afgreiðslustöðum eiga jafnframt landsmenn á fólksbílum val um að ferðast hringveginn með 40% sparnaði í eldsneytiskostnaði. Hvað gerir það fyrir ferðaiðnaðinn ?

 

Sýn þín er fögur og eðlilegt að henni sé haldið til haga.  Hagsmunaaðilar batterívæðingar verða sem betur fer að miða markaðsboð sitt í dag við tilvist  metan eldsneytis  en ekki bensín og dísilolíu. Versti  óvinur þeirra fáu sem eyja tækifæri til að skipta með sér batterímarkaðnum í heimsþorpinu er metanvæðingin. Við erum það sigldir Sigurður að við þekkjum muninn á nýju og gömlu neti.  Viðskiptahugmynd talsmanna batterívæðingar er ekki ný, prentarinn og litahylkin og ekki allt fengið þótt rafmagn sé ódýrt. Og alveg vert að spyrja sig um sjálfbærni okkar þótt við eigum rafmagnið. 

 

Það er flestum ljóst að metan og rafmagn  mun knýja ökutæki í heiminum og á Íslandi  í auknum mæli. Munurinn er einfaldlega sá að við getum aukið notkun á íslensku metani  strax í dag og þurfum ekki, að bíða í áratugi eftir meintri allsherjarlausn  og kasta  áfram dýrmætum gjaldeyri okkar á olíubálið, langt inn í þess öld.

 Í góðum anda og takk fyrir þetta Sigurður .