Nýr spjótkastari kominn í 75m klúbbinn, fleiri á leiðinni og Íslandsmet falla - sjá myndskeið

Tvö aldursflokkamet í spjótkasti féllu um helgina. Annað í Mosfellsbæ þegar Örn Davíðsson (22) kastaði 75,96m, hitt í Mannheim í Þýskalandi þar sem Sindri Hrafn (16) kastaði 66,86m.

Örn Davíðsson (22ára) og Guðmundur Sverrisson(22ára) köstuðu karlaspjótunum sem sýningar-og aukagrein á Goggamótinu í Mosfellsbæ (24.06.12) í dag og bættu sinn persónulega árangur verulega. Örn bætti sig um rúma 5 metra og setti glæsilegt Íslandsmet í flokki 22 ára og yngri 75,96m og Guðmundur kastaði 71,57m sem er sjötta bæting hans á þessu sumri. Báðir hafa þeir tryggt sér þátttökurétt á Norðurlandamóti  20-22 ára en lágmarkið eru 62m .  Í gær náði  Sindri Hrafn Guðmundsson (16 ára) einnig glæsilegum árangri í Þýskalandi þar sem hann setti íslenskt aldursflokkamet með karlaspjótinu 66,87m og náði lágmarkinu á heimsmeistaramót 19ára og yngri þótt hann sé aðeins á 17. aldursári.

Fyrir helgina átti  Örn Davíðsson  best  70,86m og Guðmundur 70,17m í spjótkasti . Guðmundur átti þó lengsta kast ársins þar sem hann kastaði 70,17m í  júní en Örn átti best á árinu 69,55m .  Ljóst var í upphitun að þeir ætluðu báðir að bæta sig á Goggamótinu .

Í fyrstu umferð kastaði Guðmundur (66,70m) og Örn  (65,92m) en Örn svaraði með kasti upp á 70,32m í annarri umferð. Guðmundur  kastaði  68,95m  í þriðju umferð og nálgaðist Örn þótt kast Guðmundar hafi verið misheppnað. Það sá Örn og  gerði sér grein fyrir að líkindi stæðu til þess að hann yrði að bæta árangur sinn til að kasta lengra en Guðmundur þennan daginn. Allt gat gerst, báðir vel fyrir kallaðir og mikil stemmning frá ungu íþróttamönnunum sem lokið höfðu keppni í veðurblíðunni á Goggamótinu.

Í þriðja kasti slóg Örn til, beindi spjóti sínu betur og  uppskar rúma 5 metra  bætingu og nýtt Íslandsmet  í flokki karla 22 ára og yngri.  Kastið mældist 75,96m en eldra metið átti  Jón Ásgrímsson (FH) 72,47m sem hann kastaði árið 1998 þá 20 ára, en Jón er hættur keppni. Guðmundur svaraði Erni með því að kasta 69,80m í fjórðu umferð en Örn gerði ógilt í þeirri umferð. Í fimmtu umferð bætti Guðmundur sinn persónulega árangur um 1,5m  með kasti upp á 71,57m . Örn svaraði með átökum sem skiluð sér ekki  til fulls, en þó 69,10m . Í síðustu umferðinni reyndu þeir báðir að beita meiri orku en þeir gátu nýtt þann daginn og gerðu ógilt. 

Niðurstaða helgarinnar var frábær, bæting hjá þremur af efnilegustu spjótkösturum landsins, Erni, Guðmundi og Sindra og tvö ný aldursflokkamet litu dagsins ljós í spjótkasti. Á myndunum  til vinstri má sjá Sindra og Anítu í keppni.  Þótt þetta sé spjótkastsfærsla verður ekki hjá því komist að geta hér glæsilegs árangurs Anítu Hinriksdóttur (16 ára) sem setti Íslandsmet í 800 m hlaupi (2:04:79) og sigraði á móti í Mannheim í Þýskalandi á sunnudaginn en fyrra metið átti Ragnheiður Ólafsdóttir FH, sett árið 1983 (2:04:90).

Örn Davíðssonar, myndband af Íslandsmeti í flokki 22ára og yngri, 75,96m - sjá að neðan
 



Guðmundur Sverrisson, myndband af persónulegu meti 71,57m - sjá að neðan

Athugasemdir

[Svandís Sigvaldadóttir (IP-tala skráð) 25.6.2012 kl. 10:50]

Sæll vertu

Gaman að sjá þessa spjótkastfærslu hjá þér, miklir kappar hér á ferð og frábært að sjá bætingarnar. Þar sem málið er mér aðeins tengt langar mig að benda þér á að Sindri Hrafn er 16 ára, verður 17 seint í nóvember.

 Bestu kveðjur, Svandís

[Einar Vilhjálmsson, 25.6.2012 kl. 13:59]

Takk fyrir þetta Svandís. Mikið rétt, Sindri er aðeins á 17 ári og búinn að ná lágmarki í spjótkasti á heimsmeistaramót unglinga 19 ára og yngri -  glæsilegt hjá Sindra sem þar fyrir utan hefur náð góðum árangri í ýmsum öðrum frjálsíþróttagreinum og fjölþraut.

[Freyr Ólafsson (IP-tala skráð) 25.6.2012 kl. 20:12]

Algerlega frábær færsla hjá þér Einar. Árangurinn magnaður! Til hamingju með þetta! Ég var með Erni í Finnlandi þegar hann bætti sig gríðarlega og fagna því að sjá hann aftur taka stórt stökk. Þetta eru glæsilegir íþróttamenn! Svo ekki sé talað um stórkostlegan árangur Anítu og frábæran árangur Sindra Hrafns!

[Guðmundur Karlsson (IP-tala skráð) 25.6.2012 kl. 20:35]

Sæll Einar

Til hamingju með strákana, spegillinn er greinilega að virka vel sem og glugginn! Góður.....

[Einar Vilhjálmsson, 25.6.2012 kl. 23:02]

Takk fyrir Freyr og Guðmundur. Þú nefnir spegilinn og gulggann sem minnir mig á okkar góðu stundir á heimsleikunum í Helsinki 1988 það sem hlutirnir gengu upp hjá okkur. Og fyrir utan uppskeruna á vellinum þann daginn þá vekur færslan þín upp skemmtilegar minningar frá undirbúningskvöldinu okkar þar sem við sátum á bekk og gæddum okkur á ís - hvernig var það annars, náði fuglinn ekki að koma smá ,,topping" á ísinn þinn :) ?  - Takk fyrir þína aðstoð á mínum keppnisferli.