Heimskalassahópefli handknattleiksmanna á erindi við íslenskt samfélag á öllum sviðum.

Sannarlega glæsileg framganga handknattleiksmanna okkar undirstrikar hverju hægt er að áorka þegar heildræn skipan mismunandi þátta vinnur samverkandi að eflingu hins megnuga sjálfs.

Samtakamáttur og verklag landsliðsmanna okkar og allra annarra sem koma að verkefnum landsliðsins þarf að verða okkur lexía til eftirbreytni á öllum öðrum sviðum samfélagsins. Þau vinnubrögð sem viðhöfð eru á þessum vettvangi og skilað hafa þeim árangri sem raun ber vitni í hópíþrótt, fyrir og eftir hrun, eiga erindi við íslenskt samfélag langt út yfir raðir afreksíþróttanna og íþrótta yfirleitt.

Verklagið, greiningin, árásarplanið, eftirfylgnin ,stöðumatið og óþreytandi samhugur og vilja við að endurmeta alla þætti í ljósi aðstæðna og án sérhygli er fátt eitt af því sem karlalandslið okkar í handknattleik getur kennt okkur öllum - sérstaklega karlpeningi þessa lands enda hefur freyjufimin í landinu þegar undirstrikað mátt kvenna í þessum efnum.

Til hamingju til okkar allra.

Æ,æ - þurfti orðið trúverðugleiki að vera í kynningarpakkanum og það undir yfirskriftinni ,,Áherslur Kauphallar Íslands‘‘

Orðið trúverðugleiki hefur ónáðað mig meira en flest orð sem mér finnst hafa riðið húsum í aðdraganda hrunsins svo ekki sé talað um tímann eftir það. Hver ráðamaðurinn á fætur orðum skellir fram þessu orði í margvíslegu samhengi og með takmörkuðum skilningi að virðist. Orðinu var ugglaust ætlað að standa fyrir áreiðanleika og heiðarleika en þau orð hafa síður verið áberandi í umræðunni á þessari öld. Þjóðin þekkir þau kannski of vel og tímann sem það tekur að ávinna sér inneign á þeim reikningum. Og svo langt hafa men gengið í umræðunni um mikilvægi trúverðugleikans að ítrekað hefur verið rætt um mikilvægi þess að sýna trúverðugleika - já, SÝNA  trúverðugleika.

Ég verð að viðurkenna að mér sárnaði að sjá þetta orð í kynningarefni Kauphallar Íslands frá árinu 2002 sem einn fjögurra máttarstólpa undir því borði sem Kauphöllin bauð/býður íslensku fjármálaumhverfi að spila á. Ekki þó svo að skilja að menn geti ekki fært merkingu orðsins í göfugan búning hver fyrir sig ef því er að skipta. Heldur hitt hvernig skapandi markaðssetning hefur fundið leið til að smíða lykla að þeim fylgsnum hugans sem hýsa áunnin hughrif um áreiðanleika og heiðarleika. Og náð að senda á loft flugdreka trúverðugleikans sem svifið hefur um á vængjum meints áreiðanleika og heiðarleika.  




Hvað segir Wikipedia um orðið ,, credibility "

,,Credibility refers to the objective and subjective components of the believability of a source or message. Traditionally, credibility has two key components: trustworthiness and expertise, which both have objective and subjective components. Trustworthiness is a based more on subjective factors, but can include objective measurements such as established reliability. Expertise can be similarly subjectively perceived, but also includes relatively objective characteristics of the source or message (e.g., credentials, certification or information quality). Secondary components of credibility include source dynamism (charisma) and physical attractiveness.´´

Já,  trúverðugleikasmiðirnir gátu komist hjá því að borgast með áreiðanleika (reliability) enda löngu ljóst að fas, framkoma og orðanna hljóðan eiga það til að vigta mun þyngra, en innihald þess sem sagt er í raun, þegar kemur að því að hafa áhrif á einhvern.

Tilgangur minn með því að deila þessu þankabroti með ykkur hér er ekki sá að saka forsvarsmenn Kauphallarinnar um ásetningsafslátt frá gömlum og góðum gildum um heiðarleika og áreiðanleika. Nei, alls ekki svo. Ég dyl það þó ekki að mér þætti mjög við hæfi að endurreist áhersluborð Kauphallarinnar væri ekki borið uppi af stólpa trúverðugleikans og að stólpar heiðarleika og áreiðanleika væru þess í stað skilgreindir og tilgreindir sérstaklega undir áhersluborði endurreistrar Kauphallar.

Já, já gott og vel - mitt fyrsta blogg, þann 1. október 2008, fjallaði um þetta orð og með því að blogga um það náði ég að losa það úr hugskoti mínu. Ég átti ekki vona á að rekast á það í þessum gögnum Kauphallarinnar sem ég bloggaði um í gær  og er ég því að losa orðið úr hugskoti mínu aftur .  

 

Best að fara í háttinn - ekki veitir af fullu þreki á morgun í baráttunni fyrir hagsmunnum lands og þjóðar þegar kemur að orkuskiptum í samgöngum. Stjúpur samfélagsins eru ansi margar sem hugnast ekki að Öskubusku verði hleypt inn á orkuskiptaballið- ansi mörgum er fegurð metanvæðingarinnar um megn. 


PS. Mitt fyrst blogg var skrifað 1.október 2008 -orðið trúverðugleiki:

Það er eitthvað við orðið trúverðugleiki sem virðist ná að fanga það fas og þá framkomu sem veitir mönnum aðgengi að jábræðrum óháð gömlum og góðum gildum sem vistuð eru í orðunum heiðarleiki og áreiðanleiki.

 Í fræðibók um þróun á atferli dýra er að finna lýsingu á því hvernig skordýrategund ein í Afríku hefur lært að viðhafa trúverðugleika til árangurs. Þannig hagar til að karldýrið þarf að mæta með bráð á markaðstorg æxlunar til að eiga séns.

Nyrst í Afríku viðhafa karldýrin þennan gjörning af samviskusemi og mæta með safaríka bráð á markaðstorgið. Töluvert sunnar í Afríku hafa karldýrin komist að því að þeir ná takmarki sínu fullkomlega með því að sýna bráðina þótt þeir hafi sjálfir notið megnsins af næringu hennar.

 Enn sunnar hafa karldýr af sömu tegund lært að þeir geta í raun komist upp með allt á markaðstorginu með því að sýna haus og hala á næringarrúinni bráð sinni ef hún er að öðru leiti hulin silkivafningi. Já , meira til. Allra syðst í Afríku er sama tegundin að verki og þar hefur trúverðugleikinn náð hámarki sínu. Karldýrin mæta á markaðstorgið með innan tóma silkikúlu og uppskera ríkulega á forsendu umbúðanna - magnað.

Sennilegast hafa karldýrin fattað þetta allt saman fyrir þúsundum ára ef ekki tugum þúsunda. Magnað að hættulegasta og grimmasta lífveran á jörðinni skuli ná að lifa og hrærast í þeirri trú á 21. öldinni að hún sé lengra kominn í trúverðugleikasmíðinni  en skordýr Afríku.

Einkennist hegðun á íslenskum peninga- og verðbréfamarkaðir af nyrsta atferlisstigi skordýramarkaðarins eða ögn sunnar ?  Hvar sem við Íslendingar erum staddir  í dag í þessu tilliti er ljóst að tilhneigingin dýra er ekki að færast norður í háttvísi ef unnt er að beita suðlægari aðferðum með sama árangri.

Hvað sögðu Þórður og Katrín á Sprengisandi Sigurjóns í dag?

Þórður Friðjónsson fyrrverandi forstjóri  Þjóðhagsstofnunar og  Katrín Ólafsdóttir  fyrrverandi hagfræðingur á Þjóðhagsstofnun voru gestir  Sigurjóns M. Egilssonar á Sprengisandi í dag. Hvað kom fram í máli þeirra ?

1. Þjóðhagsstofnun var lögð niður á sínum tíma nánast í beinni útsendingu. Kom til framkvæmda 1.júlí 2002.   Þórður Friðjónsson ráðinn forstjóri Kauphallar Íslands og kynnir starfsemina 2002 - sjá: http://www.google.is/search?sourceid=navclient&ie=UTF-8&rlz=1T4ADBR_enIS319IS319&q=%c3%9e%c3%b3r%c3%b0ur+Fri%c3%b0j%c3%b3nsson
2. Opinber tilkynning : Þjóðhagsstofnun var lögð niður hinn 1. júlí og verkefni hennar færð til Hagstofu Íslands og fjármálaráðuneytisins. Þeim verkefnum Þjóðhagsstofnunar sem snúa að mati á ástandi og horfum verður sinnt af efnahagsskrifstofu fjármálaráðuneytisins. Þess er vænst að þessar breytingar valdi sem allra minnstri röskun á þeirri þjónustu sem Þjóðhagsstofnun veitti. Reynt verður að leysa úr öllum fyrirspurnum sem hefði verið beint til stofnunarinnar af öðrum hvorum aðilanum sem við verkefnunum taka.  Sjá:  http://www2.stjr.is/frr/thst/index.htm
3. Katrín Ólafsdóttir  skrifar um ráðhaginn að leggja niður Þjóðhagsstofnun: http://www.ru.is/kennarar/katrino/Thjodhagsstofnun.pdf
4. Í þættinum heyrði ég ekki betur en að Þórður og Katrín væru sammála um eftirfarandi megin vandamál:
5. Eftir einkavæðingu bankanna 2002 hófust lánveiting til skyldra aðila - af einhverjum ástæðum náðu stjórnvöld ekki að festa hendur á þeirri starfsemi.
6. Einstaklingar tóku bankana yfir og hófu bankastarfsemi með hætti sem er sjaldséður í heiminum.
7. Seðlabankinn valdi verðbólgumarkmið við fjármálastjórn - hefur aldrei verið gert í jafn litlu hagkerfi og okkar.
8. Stjórnvöld völdu skattalækkun á þenslutíma - ekki hyggileg aðgerð
9. Þegar Jöklabréfin fara að aukast brást Seðlabankinn seint við
10. Icesafe - megin mistök - átti aldrei að gerast að útibú fengi að starfa erlendis - Icesafe dótturfyrirtæki átti að vera skilyrði.
11. Hvernig stóð á því að á miðju ári 2008 ríkti sátt um að fært væri til bókar að eigið fé bankanna væri 800-900 milljarðar en nokkrum mánuðum síðar er það skilgreint neikvætt um 6000 milljarðar - viðsnúningur upp á um 7000 milljarða.
12. Það var/er eitthvað mikið að ef banki kemst upp með að lána eignarhaldsfélögum í stórum stíl án trygginga og tekur sjálfur alla áhættu af framvindu mála.
13. Eignasafn bankanna var rýrt þar sem bankarnir tóku að mestu sjálfir áhættuna af útlánum sínum.
14. Fara ber varlega í að áætla að Seðlabankanum hafi fyllilega verið ljóst hver staðan var á hverjum tíma og/eða í hvað stefndi.  Það er verulega ofsagt að segja menn hafi talið miklar líkur á því að bankakerfið myndi hrynja þótt ýmsir hafi bent á að líkindi fyrir slíkri atburðarás hefðu aukist mikið á árinu 2006.
15. Ýmislegt jákvætt hefur gerast í bankamálum nýverið -  Íslandsbanki er kominn með nýja stjórn og skipulagning annarra í burðarliðnum.
16. Mikilvægt að hægt verði að styðjast við fjárlögin 2010
17.  Of margir virðast halda að biðstaða sé besta leiðin til að byggja okkur upp fyrir framtíðina.  EF farsæll markaðsbúskapur á að verða okkar leiðarval þurfum við að hraða því að ríkið taki putta sína úr eignarhaldsfélögum  - það að varan (fyrirtækin) séu ekki söluhæf er tvíbent fullyrðing- mikill vafi er á því að þessi nálgun sé ráðleg - hún er í raun á villigötum - eignarsýslufyrirtækin mörg hver þarf að setja sem fyrst á markað - ekki geyma alla hluti.  Forðast ber að endurtaka mistökin, halda fyrirtækjum inni í eignarhaldsfyrirtækjum með uppblásna efnahagsreikninga sem endurspegla engan veginn stöðu mála - við verðum að horfast í augu við þörfina á að koma fyrirtækjunum í markaðshæft rekstrarform  - það er enginn að leggja til brunaútsölu af verstu gerð þótt mikilvægi þess sé áréttað að taka til í efnahagsreikningi fyrirtækjanna sem fyrst og koma þeim á markað. Fyrirtækin verða að komast í form til að geta hreyft sig á markaði og skapað verðmæti. Feitur efnahagsreikningur skapar ekki sjálfgefið þann styrk né það snerpuþol og úthald sem fyrirtæki þurfa að búa yfir til að geta skapað raunveruleg verðmæti með áreiðanlegum hætti til framtíðar litið.

 Já - þetta með að vera fitt á markaði - koma sér í form - margt má um það segja - ljóst þó að lömunaráhrif endalausra útlistinga verða vart talin hjálpleg í stöðu okkar í dag.

Til hamingju Umhverfisstofnun - jók um 100% notkun stjórnvalda á umhverfisvænasta og þjóðhagslega hagfelldasta vélknúna ökutækinu sem völ er á til framtíðar litið á Íslandi- tóku í notkun metan/bensínbíl.

 Umhverfisstofnun tók nýverið í notkun metan/bensínbíl sem gerir stofnuninni kleift að spara umtalsverða fjármuni í rekstri með því að skipta út bensínbílnum. Með vali sínu leggur stofnunin einnig grunn að umtalsverðum gjaldeyrissparnaði þar sem metan eldsneytið sem bíllinn gengur fyrir er framleitt hér á landi. Þannig þarf ekki að senda úr landinu 35-40% af dæluverði eldsneytisins eins og þjóðin þarf að viðhafa til að kaupa bensín og dísilolíu af Bretum. Þar fyrir utan leggur stofnunin mikilvægt lóð á vogaskál atvinnu-og nýsköpunar í landinu og aukins orkuöryggis þjóðarinnar með sjálfbærum hætti.

Og er þá allt ósagt um þann mikla heildræna umhverfislega ávinning sem orkuskipti frá notkun jarðefnaeldsneytis ( bensín, dísilolía) yfir í íslenskt metan  hefur í för með sér í samanburði við alla aðra vélknúna valkosti til samgangna enda á rafbíllinn langt í land í að skapa viðlíka heildræna umhverfislegan ávinning . Sjá, NAS-skýrslan - engin smá frétt: http://metan.is/user/news/view/17/300  

Val Umhverfisstofnunar á metan/bensínbílum grundvallast vissulega á þeim mikla heildræna umhverfislega ávinningi sem metan/bensínbíllinn veitir fram yfir alla aðra sambærilega valkosti. Þannig má segja að hinn mikli og margþætti rekstrarlegi og þjóðhagslegi ávinningur sé kærkominn bónus fyrir stofnunina. Vonandi reynist þetta fordæmi Umhverfisstofnunar sá leiðarvísir sem gerir forstjórum 250 ríkistofnanna auðveldara með að láta hagsmuni lands og þjóðar ráða för við val á ökutækjum.

Skoðum nokkrar tölur um þann margþætta ávinning sem Umhverfisstofnun skapaði með því að skipta út bensínbíl fyrir metan/bensínbíl - tölu miðast við 200.000 km akstur og sparnað í eldsneyti sem nemur 95kr/lítra.

• Rekstrarlegur ávinningur - ef við skoðum bara sparaðan eldsneytiskostnað (nafnverð) - um 1,5 milljón kr.
• Þjóðhagslegur ávinningur -  ef við skoðum bara gjaldeyrissparnað þjóðarinnar vegna eldsneytiskaupa: um 1,1 milljón kr
• Umhverfislegur ávinningur - ef við skoðum bara minni losun gróðurhúsalofttegunda: Um 33.000 kg af CO2-ígildi. ( um 33 Tkg, 33 tonn) 

Já, er þetta ekki magnað - hér er bara um að ræða einn metan/bensínbíl og miðað við að ekið sé á metan fyrst og fremst. Auðvita er hægt að aka á bensíni á þessum metan/bensínbíl ef á þarf að halda, en hvaða ábyrgi ríkisstarfsmaður gerir það á stór-Reykjavíkursvæðinu þar sem metan er í boði í dag. Gleymum því ekki að megnið af akstri fjölmargra ökutækja í opinberrum rekstri á sér stað á höfuðborgarsvæðinu. Leiðarval og forgangsröðun ráðamanna við orkuskipti í samgöngum liggur málefnalega morgunljóst fyrir. 

1000  þakkir til Umhverfisstofnunar - farsæl ferðalög hefjast gjarnan með einu skrefi og ekki bannað að hlaupa ef hagur lands og þjóðar liggur við.

Fallegur dagur - áfram Ísland 

 

Mun alþjóðasamfélagið greiða Ecuador fyrir að framleiða ekki olíu á Amazonsvæðinu ?

Ecuador býr yfir olíuauðlindum í regnskógum á Amazonsvæðinu sem alþjóðasamfélagið leggur mikla áherslu á að verði ekki nýttar af margvíslegum ástæðum, umhverfisástæðum. Spurningin er, hversu mikils alþjóðasamfélagið metur í raun verndun regnskóganna.  Eru þjóðir heims reiðubúnar að kosta einhverju til, svo tryggja megi að ekki verði enn frekar gengið á þá mikilvægu auðlind sem regnskógarnir eru fyrir jarðarbúa.

Með þessum hætti leggur Ecuador fram fyrirspurn til alþjóðasamfélagsins við ákvörðun um frekari framleiðslu á olíu í landinu. Í þessu samhengi hefur verðmiðinn verið kynntur - 4,6 billjónir US$ eða um 585 milljarðar króna miðað við gengi krónunnar í dag ( 127kr/USD). Um er að ræða rífleg þjóðarútgjöld íslenska ríkisins á árinu 2010 (um 556 milljarðar króna).  Þjóðverjar, Bretar, Frakkar og Ítalir hafa sýnt málinu áhuga og fulltrúi Sameinuðu þjóðanna telur verkefnið verðskulda alþjóðlegan stuðning.

Fróðlegt verður að fylgjast með framvindu þess mál og því fordæmi sem málalyktir kunna að hafa í för með sér.

Sjá:  http://www.metan.is

Sjá frétt: http://www.europeanenergyreview.eu/index.php?id_mailing=14&toegang=aab3238922bcc25a6f606eb525ffdc56&id=1542

Þökk sé forseta vorum - glæsileg framganga Ólafs Ragnars Grímssonar á BBC

 Það er göfugt að gera sitt besta og skila góðu verki miðað við sig. Annað að vera afgerandi góður miðað við aðra sem vísar gjarnan til þess að vandað hafi verið við val á viðfangsefni. Innilegustu þakkir til Hr. Ólafs Ragnars Grímssonar fyrir dýrmæta ljósvakastund á BBC í gær.

 Sjá viðtal við ÓRG á BBC hér:  http://www.youtube.com/watch?v=vTP3DH5YQhc

•           Að gera sitt besta er göfugt,
•           gjarnan að mörgu að hyggja.
•           Verklag  sem unnið er öfugt,
•           ætti helst enginn að þiggja.

         

•           Eitt er að vera góður í gang,
•           genginn er annað og meira.
•           Bestum er gjarnan fært í fang,
•           farg sem margur vill keyra.

  

•          Á ögurstundu í ljósvakans vök,
•           vandaður hræðist ei spuna.
•           Krafa um uppgjör saka á sök,
•           sællega lætur sig una.

  

•           Í horni vitrum er markað mið,
•           mót skrumi rökum beitir.
•           Lengist nú ögn sú breska bið,
•           sem Browns-aðferðin veitir.

  

•           Ólafur Ragnar þökk sé þér,
•           þúsaldar framkoman ný.
•           Hælkrók naskur nýtti sér,
•           niður fór BB-sí.

Gleðilega hátíð. Nýyrðasamkeppni var um orð sem nær yfir merkingu orðanna samkeppni + lífsgæði = ?? (eitt orð). Niðurstaðan var birt nýverið og kom mér heldur betur á óvart.

Árið 1995 var ákveðið að fæðingardagur Jónasar Hallgrímssonar, 16. nóvember, yrði dagur íslenskrar tungu ár hvert.  Í tilefni dagsins,á þessu ári, efndi NMÍ til nýyrðasamkeppni um orð sem nær yfir merkingu orðanna, samkeppni og lífsgæði . Eitt orð sem gæti sameinað þessi tvö orð, samkeppni og lífsgæði . Niðurstaða var kynnt nýverið.

samkeppni + lífsgæði = ??

Þetta skemmtilega verkefni barst mér í tölvupósti á afmælisdegi þjóðskáldsins og nánast samstundis spratt fram eitt orð. Ég skrifaði það niður og ákvað að sendi það inn í samkeppnina til gamans án þess skilgreina það eða útskýra sérstaklega.

Það  þarf því vart að útskýra hversu undrandi ég varð þegar mér var tilkynnt að mitt orð hefði orðið fyrir valinu og mér boðið að veita viðurkenningu móttöku í hátíðarsal Nýsköpunarmiðstöðvar Íslands og gera grein fyrir orðinu, hugsun minni og nálgun við nýorðasmíðina.

Já....hvað átti ég að gera? Segja sannleikann - að orðið hafi nánast sprottið fram á augabragði upp úr ,,engu´´ og án þess að ég gerði mér grein fyrir rótum uppsprettunnar.

Jú, jú, eitthvað velti ég vöngum yfir orðinu samkeppni enda hef ég svo sem mætt merkinu og sviðsmyndum þess orðs með ýmsum hætti á lífsleiðinni. Orðið lífsgæði höfðaði  hins vegar til mín með persónulegri hætti ef svo má að orði komast og vakti upp tilfinningu um að orðið væri vart skilgreinanlegt nema í huga upplifandans fyrst og fremst- að almenn skilgreinin orðsins sé í eðli sínu marklaus.  

Í öllu falli fannst mér að orðið sem sameina átti þessi tvö orð þyrfti að vera brúklegt til að endurspegla bæði æskilega og óæskilega þróun mála og/eða möguleika á jákvæðri og neikvæðri niðurstöðu í einhverjum skilningi.

Orðið samkeppni vísar til kapps í huga mér og því stutt í gömul og góð gildi um að kapp sé best með forsjá. Orðið lífsgæði vísar til þess að lifa farsællega að mati lifandans og þá stutt í gömul og góð gildi um að sælla sé að gefa en þiggja. Sá sem gefur leggur eitthvað til fyrir aðra hvort heldur það er áþreifanlegt eða ekki - skilur eitthvað eftir sig fyrir aðra að njóta. Við þekkjum orðið framlag og viðskeytið ,, legð‘‘ sem reyndar hefur ekki sjálfstæða notkunarsögu í okkar máli það best ég veit.  

Hvað svo sem varð til þess að orð mitt spratt fram óforvarandis á þessum fallega degi íslenskrar tungu,  þá varð það fyrir valinu og mun ef til vill verða notað hér eftir af einhverjum til að undirstrikar eitthvað jákvætt og/eða til að varpa ljósi á mikilvægi þess að það gera meira af einhverju, minna af einhverju, byrja á einhverju eða hætta einhverju.  

samkeppni + lífsgæði =  kapplegð  ( bingó !)

Athöfnin var mjög sérstök stund fyrir mig -óvænt og gleðileg - jákvæða og eftirminnilega upplifun. Gleðilega hátíð 
 

Ps.    Við getum sagt að kapítalisminn hafi öðrum ,,ismum´´ fremur lagt áherslu á mikilvægi samkeppninnar við að tryggja sem farsælasta efnahagslega framvindu samfélagsþróunar í heimsþorpinu. Mörgum ber saman um að efnahagslegur styrkleiki og aukin lífsgæði fari saman, eigi samleið í samfélagsþróun þar sem samkeppni fær notið sín? Hvað með mannfélagsþróunina?  Fylgir mannfélagsþróunin eftir þeim meinta jákvæða ferli samfélagsþróunar sem samkeppnisumhverfið elur af sér?

Getur verið að óbeisluð samkeppni leiði til ójafnvægis á ferlum mannfélags- og samfélagsþróunar þannig að birtingarmynd siðrofs verði mannfélaginu í auknum mæli ljós og leiði til almennrar tilfinningar sem rímar ekki við hughrif aukinna lífsgæða í mannheimum? ,,Ismarnir‘‘ mættu í öllu falli láta sig varða kapplegð þess munstur sem þeir kenna sig við. ,,Ismarnir´´ þurfa ef til vill í auknum mæli að miða leiðarval sitt við aukið jafnvægi á milli mannfélags-og samfélagsþróunar ef meint lífsgæði eiga að hafa vigt í því munstri.

Orðið maður er dregið af sanskrítarrótinni man , skilst mér, sem merkir hugur. Hugur mannsins metur því lífsgæði hans með öðrum hætti en huglausrar verur. Kapplegðin varpar ljósi á samspil samkeppni og lífsgæða - samsíða ferlar á stundum, en alls ekki alltaf. Þannig stingur ögn í stúf orðið lífsgæðakapphlaup. Við hvern ætti ég að keppa um lífsgæði mín? Og ekki ,,koma þau bara´´ blessuð lífsgæðin, er það?  Jákvæð þróun kapplegðar kallar á vakandi huga, stöðumat og viðbragð.,,.Isminn´´ má ekki varna því að skipt sé um gír á mannfélags-og samfélagsvélinni- þá bræða þær úr sér fyrr eða síðar.

Aaaa, það er kannski forritað í okkar gangverk að hafa hlutina þannig ? Getur verið að kapplegð hvers og eins sé í raun fasti, sem ekki er hægt að auka, minnka eða eyða - aðeins hægt að umbreyta úr einu formi í annað. Og að með samtakamætti og sundurlyndisfjanda megi kalla fram fleiri birtingarform á útkomu en við ráðum við að skilja. Já, jarðlífið átti alltaf að vera áskorun - við vissum það - Guð er góður.

Glæsileg jólagjöf til umhverfisins

Brimborg bitir í dag á heimasíðu sinni tímamótafrétt og glæsilega jólagjöf til umhverfisins-  Volvo fyrstir með vörubíla sem ganga fyrir metani og dísil og uppfylla Euro 5 staðalinn.

Enginn ætti að þurfa að velkjast í vafa um hversu afgerandi hagfelldur sá valkostur er fyrir okkur Íslendinga að stórauka notkun og framleiðslu á okkar íslenska metani. Við Íslendingar erum með mikið forskot í þeim efnum á flestar þjóðir heims- þökk sé einstöku frumkvöðlastarfi SOPRU bs frá lokum síðustu aldar og samfélagslega ábyrgri aðkomu, Orkuveitu Reykjavíkur, REI og N1, að því verkefni.

Sjá frétt hér: http://www.brimborg.is/Lestu-frettirnar/~/NewsID/1734

Við Ómar Ragnarsson vorum í tölvupóstssamskiptum í morgun um akstursíþróttir og urðu þá til þessar vísur sem ég sendi hér til gamans.

Orkan er minnsta málið,

metan af öllu ber.

Sælt er að súpa kálið,

soðið úr ausu frá þér.  ev

.

Með skarpri skötukveðju,

ég skunda nú á braut.

Í flór og forarleðju,

finn orku í akstursþraut.   ev

.

Gleðilega Þorláksmessu

Volvo veit hvað til síns friðar heyrir í samgöngum - Volvo fjárfestir í metanframleiðslu og svarar kalli framtíðarinnar.

Volvo hefur um langt skeið verið í hópi brautryðjenda í þróun ökutækja þar sem öryggi og umhverfisleg gildi hafa verið í öndvegi.  Um alllangt skeið hafa Svíar svarað kalli framtíðar um umhverfisvænar samgöngum með einum eða öðrum hætti og sala á ökutækjum í landinu endurspeglað ríka umhverfisvitund landsmanna. Nýverið tilkynnti Volvo samsteypan um fjárfestingu í metanframleiðslu og sýna enn og aftur frumkvöðlaviðbragð sitt við að tryggja forustuhlutverk á sviði umhverfisvænna samgangna í Svíþjóð. Volvo er vissulega að svara kalli markaðarins og framtíðarinnar í Svíþjóð en hástökkvari á bílamarkaði í Svíþjóð á síðasta ári var VW Passat metanbíll sem kom mörgum á óvart hvað sölutölur varðar.     

Sú öra þróun sem hefur átt sér stað í heiminum í framleiðslu á metani út lífmassa hefur skapað ríkjum heims nýjan og umhverfisvænni valkost til að auka sjálfbærni sína í orkumálum þar sem metan eldsneytið er annars vegar.  Nýútkomin skýrsla NAS ( sjá skýrslu að neðan) varpar skýru ljósi á yfirburði metan eldsneytis í samgöngum samanborið við notkun ökutækja sem ganga fyrir etanóli eða rafmagni ( rafbílar og tvinnbílar, bensín/rafmagn) svo ekki sé tala um bensín eða dísilolíu.  Skýrslan skoðar heildrænt  þann umhverfislega kostnað sem notkun mismunandi ökutækja og orkukerfa leiðir af sér. Orðið heildrænt vísar til framleiðslu, notkunar og förgunar á ökutækjum- líftímagreiningu þeirra sem  nær til allra hluta ökutækisins, orkukerfis, endingar, varahluta, viðhalds og förgunar. Og jafnframt er auðvita skoðaður sótsporabúskapur mismunandi orkukerfa og eldsneyta og gróðurhúsaáhrif samfara framleiðslu og notkun þeirra. Rétt er að árétta að orkukerfi rafbíla samanstendur af  rafhlöðu + rafmagni. Sú neikvæða útkoma sem rafbíllinn fær, í vísindalegum og þverfaglegum samanburði, orsakast af sótsporabúskap rafhlaðna til næstu 20 ára litið.   

Mörgum kom á óvart niðurstöður í  ítarskýrslu sem NAS birti nýverið að beiðni Bandaríkjaþings um umhverfisleg áhrif af notkun mismunandi valkosta til samgangna.  Þar kom fram að meintur umhverfislegur ávinningur af notkun rafbíla, tvinnbíla (bensín/rafmagn) og etanólbíla var langt frá því að vera sá sem markaðssetning hefur vísað til. Það sem mest þótti sláandi í skýrslunni var sú niðurstaða að rafbíllinn og tvinnbíllinn (bensín/rafmagn) komu afgerandi verr út en bensínbíll sömu stærðar og að etanólbíllinn skapaði ekki umhverfislegan ávinning í samanburði við bensínbílinn. Skýrslan varpar skýru ljósi á yfirburði metan ökutækja þótt miðað sé við metan eldsneyti sem unnið er úr jarðgasi. Við getum því augljóslega séð þá gríðarlegu yfirburði sem metan ökutæki hefur á markaði ef það gengur fyrir íslensku metani sem unnið eru úr lífmassa frá yfirborði jarðar. Þetta veit Volvo og hefur brugðist við enda stutt í að markaðurinn viti þetta einnig heilt yfir. 

 Volvo  veit hvað til síns friðar heyrir í samgöngum og hefur nýverið kunngjört um áform sín og forustuhlutverk í Svíþjóð á sviði stóraukinnar metanvæðingar þar í landi. Ekki einast með auknu framboði á bílum heldur einnig með fjárfestingu í framleiðslu á metan eldsneyti.  Til hamingju Volvo,  til hamingju Brimborg.

 

Frétt um Volvo:  http://www.metan.is/user/news/view/0/311

Engin smá frétt, NAS-skýrslan:  http://www.metan.is/user/news/view/11/300

Engin smá ráðstefna í mars 2010: http://www.worldbiofuelsmarkets.com/?gclid=CKH_kqWB6p4CFUGF3god9XKsLQ

ps. Gáum að því að þar sem matanvæðing er annars vegar er um að ræða samtakamátt ríkja um aukna sjálfbærni er lítur að miklum og margþættu ávinningi hvers lands fyrir sig án samsöfnunar auðs á fáar hendur í heimsþorpinu - þið sjáið án þess að meira sé sagt hvers vegna metanvæðingin er að springa út fyrst á þessari öld en ekki löngu fyrr eins og hún hefði tæknilega geta gert. Já, auðvita þarf hvert ríki að eiga sína leiðtoga sem sanda vörð um hagsmuni lands og þjóðar - meint hlutleysi stjórnvalda er ekki til - það þarf leiðtoga til að ná vissu marki  - já, leið-toga, velja leið og toga - stundum hugnast ekki vöðvstæltu markaðsafli það sem þjóð er fyrir bestu að viðhafa.  

Innilegar þakkir til stjórnvalda - merk tímamót í sögu samgönguöryggis þjóðarinnar

Merk tímamót urðu í sögu samgönguöryggis þjóðarinnar á fundi í Umferðarstofu í gær 14.desember undir traustri fundastjórn Mörtu Jónsdóttur lögmanns stofnunarinnar.  Á fundinum voru vinnureglur og verkferlar kynntir er lúta að uppfærslu bensín-og dísilbíla  svo þeir geti einnig nýtt metan eldsneyti.  Fram kom að lög og reglugerðir varðandi uppfærslu bílvéla hafa verið aðlagaðar að alþjóðlegum viðmiðunum  og að allt sé til reiðu  í opinberu baklandi til að mæta mikilli eftirspurn.  Eftir uppfærslu bensínbíls verður bíllinn eftir sem áður skráður hjá Umferðarstofu sem bensínbíll en tilgreint í skráningargöngum að uppfærsla (breyting) á orkukerfi hafi átt sér stað þannig að bíllinn geti einnig nýtt metan eldsneyti.

Skoðunaratriði voru vandlega rædd í góðu erindi Jóns Hjalta Ásmundssonar , hjá Frumherja, og Kristófer Ágúst Kristófersson , verkefnastjóri tæknimála hjá Umferðarstofu,  gat þess að verið væri að leggja lokahönd á skoðunarhandbók  svo að allt sé til reiðu strax í janúar á nýju ári- 2010.

Sigurður Ástgeirsson,  fulltrúi Íslenska gámafélagsins og Vélamiðstöðvarinnar, ræddi verkferla við uppfærslu bíla og greindi frá frumkvöðlastarfi fyrirtækjanna við uppfærslu á bílum.  Hann gat þess að fyrirtækið væri að ráða starfsmenn þessa dagana og að fyrsta gámasendin á uppfærslubúnaði kæmi til landsins í lok þessa mánaðar.  Og að strax á nýju ári væri mikils að vænta frá fyrirtækinu á þessu sviði enda hafi eftirspurn verið gríðarlega mikil á þessu ári. Hann gat þess að kostnaðurinn við uppfærslu réðist að stórum hluta af því hvort viðskiptavinir óskuð eftir  nýsmíði  til að koma metantanki fyrir eða settu hann í farangursrými bílsins sem væri  langódýrasta fyrirkomulagið. Og einnig  að fjöldi tanka réði nokkru um kostnaðinn sem og stærð véla. Verð frá  400.000 kr var nefnt á fundinum  sem raunhæft viðmið fyrir stóran hluta bílaflotans  miðað við að eldsneytistankur sé hafður í farangursrými.

Fundinn sátu um 30 manns og fyrirspurnir og umræður voru nokkrar.  Spurt var um þann mikla umhverfislega ávinning sem notkun ökutækja hefur í för með sér ef þau ganga fyrir íslensku metani og það áréttað að um það væri enginn faglegur ágreiningur þar sem íslenskt metan væri framleitt úr lífrænu efni frá yfirborði jarðar. Að  orkugjafinn sé tilkominn með ferðalagi kolefnis ( C) frá andrúmsloftinu ( CO2) í lífrænt efni og þaðan í metan eldsneyti  sem skilar svo kolefninu aftur út í náttúruna í formi sem allar grænar plöntur þurfa að fá til að geta vaxið ( CO2).

Einnig vöru öryggisatriði rædd og það áréttað að metan eldsneyti væri skilgreint sem öruggara eldsneyti til samgangna en bensín og dísilolía. Og að hér ráði mestu eftirfarandi atriði:

• Metan eldsneyti er skaðlaust við snertingu og innöndun
• Metan er mun eðlisléttara en andrúmsloftið og stígur því hratt upp ef það losnar út í umhverfið.
• Eldhætta á metani í lokuðu rúmi skapast aðeins á afar þröngu bili efnastyrks , 4-14%. Þannig skapast ekki eld-eða sprengihætta af metani í umhverfinu með sama hætti og viðvarandi er í tilfelli bensíns og dísilolíu við sambærilegar aðstæður.
• Hitastig sjálfíkveikju er mun hærra fyrir metan, en bensín og dísilolíu
• Eldsneytistankar fyrir metan eru mun sterkari en sem nemur kröfum voru settar voru á sínum tíma fyrir bensín-og dísiltanka.
• Metan er lyktarlaust eldsneyti (lyktarefni þó bætt út í) og engin hætta á tjóni á fatnaði eða farangri við afgreiðslu þess.

Því var kastað fram í umræðu um öryggismál að fróðlegt væri að snúa þessu máli við og velta fyrir sér umræðu um öryggismál í samgöngum ef heimsbyggðin væri að fullu metanvædd og umræðan snérist um innleiðingu og öryggi bensíns - bensínið yrði sennilegast ekki samþykkt í dag.

Þá urðu einnig nokkrar um ræður um stefnu stjórnvald varðandi álögur á metan eldsneyti og það áréttað að stjórnvöld geri sér fulla grein fyrir þeirri staðreynd að óþarft er að leggja sérstakar álögur á íslenskt metan til að mæta minnkandi tekjum af sölu bensíns. Ástæðan er margþætt  en mynnt var á gjaldeyrissparnaðinn og þá staðreynd að með hverjum lítra af bensíni  sem sparast með notkun á metani helst í landinu andvirði um 35-40% af dæluverði bensíns, sem ella færi til Bretlands vegna kaupa á bensíni,  og að það fjármaga skipti þess í stað um hendur í landinu og skapar stóraukinn stofn til innheimtu virðisaukaskatts til ríkisins. 

Það varð öllum ljóst er sátu fundinn að hann markaði söguleg tímamót og varpaði skýru ljósi á meðbyr og skilning stjórnvalda á því að stóraukin metanvæðing í landinu er  og raunsær og aðgerðarhæfur valkostur sem veitir þjóðinni mikinn og margþættan ávinning , eykur sjálfbærni og orkuöryggi þjóðarinnar með hætti er lítur að sjálfstæði þjóðarinnar til framtíðar liðið  - 1000 þakkir til stjórnvalda fyrir afgerandi heillaspor í rétta átt.

,, Senn mun Íslands umferð batna

  eflist rekstur líf og getan.

  Hagur vex á grundum gatna,

  gæfusporið íslenskt metan. ´´

 Er þetta ekki annars fallegur dagur.